இருளில் குழந்தைகள்

குழந்தைகள்
விளையாடிக்கொண்டிருக்கும்போதே
இருள் வந்துவிட்டதை
கவனிக்கவில்லை
சட்டென திரும்பிப் பார்த்து
இருளைக் கண்டு வியக்கிறார்கள்
அது அவர்களுக்கு
அவ்வளவு அருகில்
நின்றுகொண்டிருந்தது
மிகவும் உயரமாக இருந்தது
கனத்து தெரிந்தது
குழந்தைகள் தொட்டுப் பார்க்கிறார்கள்
அது அவர்கள் கையில் ஒட்டுகிறது
மௌனமாக
அங்கேயே இருக்கிறது
பயத்துடன் வீடு திரும்பும்
குழந்தைகளுடன்
கூடவே நடந்து வரும் இருள்
அவர்கள் வீட்டிற்குள் போவதை
வாசலிலேயே நின்று பார்த்துக்கொண்டிருக்கிறது
அப்படி ஒரு ஏக்கத்துடன்
எப்போது விடியும் என்று

உற்றுப் பார்க்காதே

எதையும் உற்றுப் பார்க்காதே
நம் கண்களின் வெப்பம்
மலர்களை வாடச் செய்துவிடுகிறது
நம் கண்களின் இருட்டு
பிரகாசமான இடங்களை இருள வைக்கிறது
நம் கண்களின் ஊடுருவல்
யாரோ ஒருவரை
நிர்வாணத்தில் நடுங்கச் செய்கிறது
நம் கண்களின் தந்திரம்
நமது நோக்கங்களை வெளிப்படுத்துகிறது
நம் கண்களின் தீமை
குழந்தைகளை நோய்மையுறச் செய்கிறது
நம் கண்களின் வேட்கை
ஒரு புழுவினைப்போல ஊர்ந்து செல்கிறது
நம் கண்களின் சந்தேகம்
எதையும் அதனிடத்தில் பார்க்க மறுக்கிறது
நம் கண்களின் பதட்டம்
தொட்டியிலிருக்கும் மீன்களை
அமைதியிழக்க வைக்கிறது
எதையும் உற்றுப் பார்க்காதே
நம் கண்களின் பயம்
எல்லோரையுமே பயப்பட வைக்கிறது

துணை

அத்துவான வேளையில்
இந்த வயல் வெளியெங்கும்
கண்ணுக் கெட்டிய தூரம்
யாருமே இல்லை
இரண்டு தென்னை மரங்களுக்கு
நடுவே காய்ந்துகொண்டிருக்கிறது
ஒரு ஈரப் புடவை
அத்துவான வேளையில்
இந்த வயல் வெளியெங்கும்
கண்ணுக்கெட்டிய தூரம் வரை
யாருமே இல்லை

பார்க்கும் மனிதன்

எப்போதோ பிரிந்துபோனவனை
மறுபடி சந்திக்கையில்
எனக்குப் பேச ஒன்றுமே இல்லை
அவனது தலையில்
புதிய நரைகளைப் பார்த்தேன்
தவிர
கண்ணாடி அணிந்திருப்பதை
வேறுவிதமான சட்டைகள் அணிவதை
சற்றே பருத்திருப்பதை அல்லது மெலிந்திருப்பதை
விரலில் ஒரு வெட்டுக் காயம் இருப்பதை
நாற்காலியில் அமரும் விதத்தை மாற்றிக்கொண்டிருப்பதை
கண்களுக்கு கீழே படர்ந்திருக்கும் கருவளையத்தை
அடிக்கடி உச்சரிக்கும் ஒரு சொல்லை
புன்னகையில் ஒரு உலர்ந்த தன்மை ஏறியிருப்பதை
கழுத்தில் இருக்கும் சங்கிலியில் தொங்கும் டாலரை
ஏன் இதையெல்லாம் பார்க்கிறேன்
அவனைப் பற்றி அறியக்கூடிய ரகசியம்
இது மட்டுமே என்பதாலா
ஒரு உடலாக மட்டுமே
மனிதர்கள் திரும்புகிறார்கள்
என்பதாலா
மேலும்
பிரிந்துபோவதற்குமுன்பு
அவனை ஒரு நாள் கூட
ஒருமுறைகூட
இப்படி கவனித்த நினைவே இல்லை

    
தப்பிப்பு
 புணர்ச்சி முடிந்து
கண்கள் சந்தித்துக் கொள்ளாமல்
தூங்கிப் போனார்கள்

தூய வடிவில்
 
இந்தப் பகல் முழுக்க
பசி என்ற
ஒரே ஒரு உணர்ச்சிதான்
என்னை ஆள்கிறது
இந்த இரவு முழுக்க
காமம் என்ற
ஒரே ஒரு உணர்ச்சிதான்
என்னை ஆள்கிறது
எந்தக் குழப்பமும் இல்லை
எனது தூய வடிவில்
இருக்கிறேன்